Zamonaviy dizaynerlar ijodkorlik va kreativlikda hech qanday chegara bilmaydi va bugungi kunda hech kimning xayoliga kelmas g‘ayrioddiy moda namunalari bilan barchani lol qoldiradi. Quyida sizga dunyodagi eng noodatiy ko‘rinishda bo‘lgan dizaynerlik poyabzallar ro‘yxatini taqdim etamiz.
Prujinali poshna
Off-White kiyim-kechaklar va poyabzallar brendiga tegishli mazkur oyoq kiyimlar poshna qismi prujina shaklida ishlangan. Ularning narxi 600 dan 1000 dollargachadir.
Barmoqli shippaklar
Rossiyalik dizayner Sasha Kanyon Adidas Yeezy Slide shippaklarini bir dona barmoq ko‘rinishida ishlab chiqdi. Bunday oyoq kiymni xarid qilishning iloji yo‘q, chunki shippaklar birgina nusxada tayyorlangan.
Tennis-lover
Tennis ixlosmandlari uchun ajoyib tanlov! Bunday tufli aktrisa Zendeya uchun dizayner Jonatan Anderson tomonidan maxsus tayyorlandi. Gollivudning yosh yulduzi “Da’vogarlar” filmiga bag‘ishlangan oqshom dasturiga Loewe kompaniyasiga tegishli poshna qismi haqiqiy tennis sharidan iborat poyabzalda tashrif buyurdi.
Lak, sovun, gul, sham va tuxumli poshna
Loewe brendiga mansub g‘ayritabiiy ko‘rinishdagi oyoq kiyimlarning yana bir qancha turi 2022-yilda taqdim etilgan. Ajoyib poyabzallar eng odatiy predmetlar — gul, tuxum, sovun, sham kabilar ko‘rinishida ishlangan. Bunday oyoq kiyimlar narxi o‘rtacha 1600 dollarni tashkil etadi.
Godzilla poyabzali
Yaponiyalik dizayner Matsui Ryosuke “Godzilla: minus bir” filmining premyerasi uchun loyiha ishtirokchilariga Hazama deb nomlangan poyabzallar kolleksiyasini yaratdi.
Mandarinli sandallar
Italiyaning Canapés brendi yarim tozalangan mandarin shaklidagi poshnali sandallarning kolleksiyasini taqdim etdi. Qo‘lda tayyorlangan poyabzallar seriyasi cheklangan bo‘lib, narxi 600 dollardan boshlanadi.
Paypoq-krossovkalar
Balenciaga modalar uyi paypoq va krossovkani birlashtirgan g‘aroyib poyabzalni ishlab chiqdi. Uning narxi 975 AQSH dollaridir.
Oltin barmoqlar
Schiaparelli brendi tomonidan yaratilgan va narxi 2000-5000 dollar bo‘lgan mazkur oyoq kiyim turli mavsumlarga mo‘ljallangan.
Izoh (0)